Hoxe publicamos as bases da XXIV edición do Premio de tradución Plácido Castro. Poderán concorrer ao galardón obras traducidas ao galego publicadas no pasado ano 2025.
O prestixioso premio de tradución cumpre un cuarto de século co obxectivo de promover a tradución ao galego de obras literarias en outros idiomas. Tamén queremos recordar a figura de Plácido Castro, humanista, liberal, cosmopolita, que quixo estimular coas súas traducións a recuperación explícita da nosa identidade.
Este ano presenta algunhas novidades que agardamos sexan ben recibidas tanto polos tradutores e tradutoras, como polas propias editoriais que de xeito xeneroso veñen colaborando co premio durante tantos e tantos anos.
Unha delas vai ser o establecemento dunha selección previa da que sairán 5 finalistas. Tamén ofrecemos a posibilidade de presentar unha pequena mostra representativa da obra e non a obra completa para evitar gastos excesivos das editoras.
As bases completas pódense consultar na propia web da Fundación.
Agardamos a vosa participación e apoio como de costume facedes.
