Máximas e Reflexións de Plácido Castro / Identidade

• Identidade

O galego posúe certa aptitude camaleónica, o cal pode incluso, en certas circunstancias, ter o seu mérito.

• Nacionalismo

Os que cremos que o nacionalismo galego é “renacente” e non “nacente” temos que pensar que debe seguir buscando a súa inspiración no antigo, no tradicional, no que diferencia ao noso país dos demais.

• Universalismo

O patriotismo das pequenas nacións é sempre pacifista porque xorde dun puro amor á terra.

• Xeral

¿Non é preferible o descontento do idealista á vaidade do que está satisfeito?

• Acción exterior

O Atlántico é para nós un lazo que axunta e non un abismo que arreda.

• Democracia

Cal das dúas tendencias é a verdadeiramente democrática? A que ve a sociedade como unha escaleira cuns chanzos sinalados con cantidades de dólares, ou a que considera a todas as súas clases igualmente dignas e se preocupa da igualdade política e xurídica de tódolos seus membros?.

• Galeguismo

Se aos galeguistas nos movese un mero interese partidista alegrariámonos da decadencia e dos erros doutros partidos galegos. Pero os que pertencemos a un partido que só existe para lograr a liberación de Galicia temos que lamentar os erros dos nosos adversarios cando supoñen o afrouxamento da unidade galega.

• Identidade

Un pobo é tanto máis eficiente e admirado canto menos se deixa influenciar polo resto do mundo.

• Nacionalismo

Grazas ao nacionalismo, Galicia chegou a ter unha personalidade fóra de España á que non podería aspirar se se contentase con ser un pobo asimilado por un Estado español uniforme.

• Universalismo

Os posuidores en Galicia dun espírito xenuinamente internacional, universalista, libre de supersticións patrióticas, son precisamente os nacionalistas galegos.