Máximas e Reflexións de Plácido Castro / Xeral

• Xeral

É difícil decidir se unha idea política é avanzada ou reaccionaria porque as transformacións do espírito humano fan parecer retardador o que anteriormente se nos antollaba progresivo.

• Acción exterior

Unha Galicia galeguista non só terá unha intensa vida propia, senón que se atopará ligada a un conxunto de pobos ibéricos, a unha comunidade de países galaico-lusitanos, a unha irmandade de terras célticas que proxectará en cada un o seu espírito propio e que recibirá de cada un o estímulo peculiar da súa cultura.

• Democracia

Se a aspiración do galeguismo de que Galicia sexa unha democracia libre de privilexios, na cal impere a xustiza social e económica e a liberdade cidadá, aspiración tan galega, tan razoable, tan pouco estridente, resulta ser na contenda política española algo terriblemente revolucionario e esquerdista, a culpa non será en derradeiro termo dos galeguistas, senón do atraso mental en que viviu España ata hai pouco tempo.

• Galeguismo

O nacionalismo ten que decidir se para a Galicia do porvir vale máis a feble esperanza dunha próxima e limitada autonomía ou a absoluta integridade e supervivencia do auténtico contido separatista do galeguismo.

• Identidade

O noso non será tan só o que nos chegue máis dentro senón aquilo que en maior grao fará gozar a quen nos visita.

• Nacionalismo

Os nacionalismos poden seguir dous cursos, segundo o criterio dos gobernos centralistas contra os que se alzan. A autonomía concedida a tempo pode deter o proceso de disgregación e evitar a separación completa. A tardanza nas concesións ou a falta de xenerosidade fortalecen o nacionalismo e aseguran o seu triunfo completo.

• Universalismo

Un galeguismo sensato non impedirá que esteamos sempre en contacto coa cultura europea, un contacto máis íntimo que o que manteriamos por medio das traducións das ideas europeas que nos presentan os pensadores madrileños.

• Xeral

A poesía é a arte mais fermosa. A tolerancia, a cualidade mais digna da alma humana.

• Arte

A arte popular é un lazo de unión entre os pobos porque é o mais espontáneo e o máis humano que cada un produce; xorde en tódalas nacións de motivos case idénticos.

• Democracia

Se os galegos teñen dignidade veranse obrigados a buscar por outros medios o recoñecemento dos dereitos que se lle negan cando legalmente os afirman.