Máximas e Reflexións de Plácido Castro / Galicia

• Galicia

Ningunha colonia deixou de selo ata que espiritualmente se redimiu. E Galicia, que hoxe por hoxe é unha colonia, aínda non se redimiu a si mesma.

• Irlanda

Eu, persoalmente, prefiro o entusiasmo apaixonado dos rebeldes irlandeses á indiferenza murmuradora dos galegos desgaleguizados.

• Saudade

A saudade é un sentimento que inunda a nosa arte e o amor á terra non é senón unha das súas múltiples manifestacións aínda que non a máis importante delas.

• Xeral

A diplomacia é unha cousa tan delicada que non resiste a presenza da verdade.

• Celtismo

Entre tódalas culturas europeas é a céltica, coa grega, a máis digna de rexurdir, a que mellor pode servir de inspiración aos homes do noso tempo.

• España

Os defensores da unidade española non actúan impulsados por un sentimento de unión ou de solidariedade senón que os anima un afán de hexemonía, unha ansia de grandeza e de autoridade.

• Galicia

Dáse o caso de que os verdadeiros inimigos de Galicia están entre nós, ou usurpan fóra de Galicia a representación do noso pobo. Son os que subordinan os intereses de Galicia ás súas comenencias persoais ou partidistas, os homes sen ideal cívico nin democrático.

• Irlanda

Saio de Irlanda convencido de que a súa independencia lonxe de significar unha desintegración ou a destrución dunha unidade, foi un acto de verdadeira creación.

• Saudade

Desterrar a saudade, a inspiración fundamental da arte céltica, paréceme algo así como unha forma de suicidio.

• Xeral

Se o fundamental nun partido é a súa ideoloxía, expresada nun programa, o esencial para fixar a súa posición política será esta ideoloxía e non os pactos que poida concertar con outros partidos.