Máximas e Reflexións de Plácido Castro / Galicia e España

• Galicia e España

Galicia, sendo galega, é mais universal e ten mais personalidade que se perde a súa identidade nun Estado español uniforme.

• Lingua

O feito de ser unha creación do noso pobo é unha razón que abonda para que o galego sexa para nós a lingua máis importante do mundo. Se o cultivamos chegaremos a comprendernos e a expresar as nosas ideas, moito máis importantes para nós que as dun filósofo alemán ou un novelista ruso.

• Universalismo

Unha constante aspiración do galeguismo, que aínda que pareza estraño aos que nos chaman separatistas, é a da universalización de Galicia.

• Xeral

É posible que en política unha persoa nunca deba referirse ao imposible, porque as sorpresas son sempre unha cousa que debe esperarse.

• Ciencia

Seguimos crendo en moitas cousas que o noso intelecto non acepta como verdadeiras no sentido científico pero que non abandonaremos nunca ante os avances da ciencia porque serán sempre unha parte esencial da nosa mentalidade.

• Galeguismo

O dilema actual de Galicia é o seguinte: ou galeguismo ou morte; ou crear unha vida propia ou seguir sendo imitadores.

• Galicia e España

O erro dos que se identifican co espírito da meseta, por natureza ou por adaptación, consiste en supor que os nacionalismos ibéricos son iguais.

• Lingua

Á lingua galega ningunha lle gaña en calidades e posibilidades poéticas.

• Universalismo

O nacionalismo, lonxe de constituír un motivo de apartamento e de división, vén a ser un axente de aproximación e de pacificación moito máis eficaz que as ideas internacionalistas, ocas e inútiles porque ninguén as sente con convicción.

• Xeral

A necesidade de meditar ben o que se vai facer impón un incómodo período de incerteza e é certamente un inconveniente pero a vantaxe de saber que non se tomou unha decisión precipitada constitúe unha ampla compensación.