XXIV Premio de Tradución Plácido Castro
Bases
A Fundación Plácido Castro, da que forman parte os concellos de Cambados, Catoira, Corcubión e Vilagarcía de Arousa, a Asociación Galega de Profesionais da Tradución e da Interpretación (AGPTI) e o Instituto Galego de Análise e Documentación Internacional (IGADI), convoca o Premio Plácido Castro de Tradución, destinado a promover versións en lingua galega de obras literarias doutras linguas. Lémbrase, deste xeito, a figura de Plácido Castro, humanista, liberal, cosmopolita, símbolo da universalidade do nacionalismo galego, que quixo estimular coas súas traducións a recuperación explícita da nosa identidade.
- Poderán participar na convocatoria da vixésimo cuarta edición do Premio Plácido Castro de Tradución obras traducidas ao galego e publicadas no ano inmediatamente precedente (2025) en formato papel ou dixital. En ningún caso se poderán presentar obras cuxas autoras ou autores recibisen este galardón nalgunha das tres edicións anteriores.
- Poderán presentar candidaturas tanto tradutoras e tradutores coma editoriais, sen que exista un límite de obras por tradutora ou tradutor.
- A presentación como candidata ao premio implica a conformidade coas presentes bases.
- O xurado do premio estará composto por cinco persoas que actuarán en representación das institucións seguintes: Asociación de Escritoras e Escritores en Lingua Galega, Asociación Galega de Profesionais da Tradución e da Interpretación (AGPTI), Facultade de Filoloxía e Tradución da Universidade de Vigo, Real Academia Galega e Xunta de Galicia. Actuará como secretario con voz e sen voto unha persoa en representación da Fundación Plácido Castro. Estará facultada para resolver calquera dúbida a propósito destas bases e poderá instar o asesoramento que considere oportuno.
- As candidaturas que se presenten ao premio estarán compostas pola documentación seguinte:
- Unha mostra de entre 5 e 10 páxinas representativas do libro, en PDF. Non será preciso que sexan as páxinas iniciais do libro nin que se trate de páxinas consecutivas.
- Unha breve xustificación da proposta, dun máximo de 1000 palabras e en PDF, na que se terán en conta os criterios de valoración que figuran no punto 10 destas bases.
- As candidaturas enviaranse por correo electrónico ao enderezo info@igadi.gal antes do 7 de marzo de 2026.
- Aceptaranse obras de calquera xénero literario, sempre e cando se trate de versións íntegras.
- Entre as candidaturas presentadas, cada membro do xurado escollerá unha obra preferente e unha suplente. As obras preferentes conformarán as finalistas. Só se recorrerá ás obras suplentes nos casos seguintes:
- De forma obrigada, se houber dúas ou máis obras dunha mesma tradutora ou tradutor. Deste xeito, exclúese a posibilidade de que unha persoa sexa finalista con dúas ou máis obras.
- De forma opcional, se houber coincidencia entre membros do xurado e se quixer esgotar o número máximo (cinco) de finalistas.
- Do máximo de cinco obras finalistas, que se darán a coñecer ao público, a Fundación será a responsable de facerse cos exemplares, que enviará aos membros do xurado para a súa valoración.
- Os membros do xurado terán en conta, tanto na preselección de finalistas coma na selección da obra gañadora, os criterios de valoración seguintes e atendendo a esta orde de preponderancia:
- O traballo tradutolóxico realizado pola autora ou autor da tradución, que incluirá, entre outros aspectos, a corrección lingüística (tanto de estilo coma de ortotipografía), a calidade da versión, a dificultade do orixinal, os criterios de lectura e interpretación do orixinal, a adaptación ao lectorado etcétera.
- A relevancia da obra nas dúas culturas.
- O xurado reunirase en setembro para deliberar e dará a coñecer de inmediato a identidade da persoa premiada. Fará públicas as razóns nas que se fundou para a concesión do premio.
- O premio consistirá nun diploma acreditativo e unha peza escultórica deseñada expresamente para o concurso, obra de Xaquín Chaves. Así mesmo, estará dotado con 3000 euros.
- A entrega do premio terá lugar no lugar e data que sinale a Fundación Plácido Castro.